Berriak

Ekainaren 7an, 6 hezkuntza kategorietan eTwinning 2024 sari nazionala jasoko duten irakasle espainiarren zerrendak argitaratu ziren. Sarituen artean Nafarroako lau irakasle daude: Aurea Garde eta Ana Frago, Iruñeko Julio Caro baroja BHIkoa (Micro & Nano proiektua); Isabel Canal, Iruñeko Jesuitinas ikastetxekoa (eTwinning behind the scenes proiektua), eta Marisol Montañés, Tuterako Huertas Mayores HLHIPkoa (A rainbow of emotions proiektua).

Hizkuntza eta Kultura Portugesen Programa herrialde horretako hizkuntza eta kultura hedatzeko programa bat da. Espainiako ikastetxeetan gauzatzen da, portugaldarren ondorengoak hobeki integra daitezen eta bestelako nazionalitateetako ikasleek kultura eta hizkuntza portugesak ezagutu ditzaten.

Espainiako Oinarrizko Osasun Laguntzako Pediatria Elkarteak gomendio batzuk ditu bere webgunean, haurrek Internet nola erabili arautu behar duten familientzat.

Hispana Espainiako ondare digitalera sartzeko ataria da, eta Europeanan Espainiako edukiak gehitzen dituena. Haren helburua da Espainiako kultura eta zientzia ondarea Internet bidez eskuratzeko aukera eskaintzea, metadatuak eskuragarri jarriz eta esteken bidez web jabeetara birbideratuz. Halaber, Europako liburutegi digitalean, Europeanan, erakundeen edukia gehitzeaz arduratzen da, haiek hala nahi badute.

Educa IGN Institutu Geografiko Nazional eta Informazio Geografikoaren Zentro Nazionalaren hezkuntza baliabideak dira, lineakoak, irekiak eta doakoak, eta hezkuntza etapa desberdinei zuzentzen zaizkie. Gaur egun, bereziki baliagarriak dira bi baliabide hauek: GeoExplorer, haurrentzako jarduera koadernoa, geografia eta Lurraren zientziak ezagutzen hasteko modu dibertigarrian, sei urtetik gorakoentzako jolas eta esperimentuen bidez; eta GeoSapiens, geografiako jolas interaktiboak, Lehen Hezkuntzako eta Bigarren Hezkuntzarako ikasleek geografia fisikoari, politikari eta paisaiari buruz dituzten ezagutzak probatzeko.

2024ko Juul sariak eman zaizkie haur eta gazte literaturako zenbait idazle eta ilustratzaileri, zehazki Nafarroako Ikastolen Elkarteak urtero antolatzen duen bozketan boto gehien jaso dutenei.

Escritura(s) fundazioak bi gidaliburu didaktiko sortu ditu Lehen Hezkuntzako eta Bigarren Hezkuntzako ikasleentzat, ikasgelan idazketa tailer bat sortzeko eta kudeatzeko tresna izan daitezen. Hezkuntzako eta Lanbide Heziketako Ministerioak gune bat gaitu du, proiektuaren nondik norakoak kontsultatzeko.

Nafarroako Eskola Kontseiluak neurohezkuntzaren gaia jorratzen duen IDEA aldizkariaren 58. zenbakia argitaratu du.

Hezkuntza eta Lanbide Heziketako Ministerioak paseoan egiteko jardueren gida egin du, jolasen bidez seme-alabak hezteko familiartean paseatzen dugunean.

Programamos funtsezko tresna da, ahaleginak batzen dituena programazioaren ikaskuntza eta irakaskuntza hobetzeko Scratch 3.0 tresnarekin.

Jaso ikastolak Itsas-7 musikala jarri du martxan. Urtero, maiatzean musikal bat estreinatzen dute, eta aurtengoa hamabigarren edizioa izanen da. Ikuskizun bakoitza gizarteko gai baten ingurukoa da; aurten, landa-despopulazioa da gaia. Aurreko urteetan, besteak beste, alzheimerra, autismoa, teknologia berriak, feminismoa eta homofobiaren aurkako borroka jorratu zituzten.

EnLinea INTEF webgunean, ikaskuntza-esperientziak erakusten zaizkio interesa duen edonori (gaztelaniaz eta ingelesez). Proposamenak ebidentzien agregazio digitalera bideratuta daude, ikuspegi praktikoa dute batez ere, eta jarduera-planek irakaskuntzako konpetentzia digitala eskuratzea, hobetzea eta garatzea sustatzen dute, honako hauen bidez: berdinen arteko ikaskuntza, prestakuntzako ebaluazioa eta lankidetza. Horrela, komunitate profesionaleko kideek elkarrekin ikasten dute, harremanetan jartzen dira eta ikaskuntza modu autonomoan kudeatzen dute.

PlayÓpera webguneak operara modu dibertigarrian hurbildu nahi gaitu. Lehen Hezkuntzako ikasleei zuzendua dago, eta jolas eta azalpen argiak eta errazak ditu. Irakasleentzako atal bat du, fitxa eta partitura sinplifikatuak deskargatzeko.