Nafarroako Unibertsitate Publikoko (NUP) ikertzaile batzuek beste bi ibilbide diseinatu dituzte Iruñeko beste hainbeste auzotarako, Nafarroako hiriburuan barrena Lehen Hezkuntzako 5. eta 6. mailako eta DBHko 2. eta 3. mailako ikasleei zuzendutako ibilbide matematikoak sortzeko proiektu baten barrenean. Proiektu hori joan den ikasturtean hasi zuen Iruñeko Udalak, eta “CalleMath” izena eman zion.
Diseinatutako ibilbideak euskaraz zein gaztelaniaz egiten dira auzo hauetan barrena: Sanduzelai-Buztintxuri, Arrotxapea, Alde Zaharra, Iturrama, Donibane-Ermitagaña, Mendillorri eta Txantrea.
Ibilbideen helburua da matematika kalean lantzea, ikasleak talde txikitan banatu, eta lekuan bertan ebatzi beharreko problemak jarrita. Leku horiek lotura izanen dute problemarekin: toki jakinak, eraikinak, eskulturak, hiri-altzariak, eta abar. Horretarako, informazioa edo pistak emanen dira, batzuk grafikoak eta besteak testu formatukoak. Batez beste bi orduko ibilbideak dira, eta horietan, matematikaz gain, ikasleek beste kontzeptu batzuk ere ikasiko dituzte, artearekin, historiarekin, hiriko ohiturekin, ingurumenarekin, elikadura osasuntsuarekin eta genero berdintasunarekin lotutakoak. Proposamen pedagogiko hori eskuragai dago MathCityMap izeneko mugikorretarako aplikazio batean, zeina edonorentzako librea eta doakoa baita. Gainera, irakasleentzako eta ikasleentzako gidaliburuak ere inprimatu dira (deskargatzeko, klikatu hemen). Horretaz gain, Irakasleei Laguntzeko Iruñeko Zentroak prestakuntza espezifikoa eman die irakasleei.
Sarrera hau ere eskuragarri dago hemen: Espainiera