Berriak

Nafarroako Liburutegi Sareak ehun jarduera baino gehiago proposatzen ditu apirilaren 23an ospatuko den Liburuaren Nazioarteko Eguna dela eta. Helburua irakurtzeko ohitura sustatzea da, gustu eta adin guztietarako jardueren bidez.

CanSat Europako Espazio Agentziaren ekimena da, eta Europa osoko bigarren hezkuntzako ikasleei erronka hau proposatzen die: freskagarri-lata baten tamainako satelite txiki bat eraiki eta jaurtitzea. Eskualde-fasea STEM Planetak antolatu du, zeina bokazio zientifiko eta teknikoak sustatzeko dibulgazio-programa bat baita, Nafarroako Gobernuko Unibertsitateko, Berrikuntzako eta Eraldaketa Digitaleko Departamentuak sustatua eta  Iruñeko Planetarioak koordinatua. Los Arcoseko zirkuituan egin da martxoaren 21ean.

2+3 Talentu Plana Hezkuntza Departamentuaren eta Nafarroako Unibertsitate Publikoaren ekimen bat da, lanbide heziketakoa, Nafarroako ikasleek prestakuntza ibilbide bat egin dezaten bost ikasturtetan, goi-mailako ziklo bat eta unibertsitateko gradu bat batuz (2+3).

Hainbat kulturatako gazteek eztabaidatu dute nola aurre egin arrazakeriari Caro Baroja BHIn, institutuak berak eta Iruñeko Udalak Batxilergoko 1. mailako ikasleendako antolatu duten ekitaldi batean. Ekitaldi honekin Arraza-diskriminazioa Ezabatzeko Nazioarteko Eguna ospatzen da.

Orain dela bi urtetik hona, Lisboako, Oloroe-Donamariako (Frantzia), Vienako eta Iruñeko bost ikastetxek parte hartzen dute Erasmus+ TOTEM proiektuan. Europako memoria ibilbideak sortuz, herritar nortasuna eraiki eta betikotu nahi da, balio hezigarri, sozial eta demokratikoetatik abiatuta. Ikasleak sentsibilizatu nahi dira bizi garen eskualdeak markatu dituzten gertaera tragikoei buruz: gerrak, errepresioa, deuseztatze esparruak.

LuzIA fundazioak zenbait jarduera antolatu ditu Nafarroako Gobernuarekin batera, hala nola Liceo Monjardín ikastetxean eginiko «Adimen artifizialaren astea». Orain, Iruñeko El Molino eta Tuterako Torre Monreal hezkuntza bereziko ikastetxeen txanda heldu da, eta, ondoren, Zizurko BHIrena. Urrian ikastetxe gehiago bilduko dira ekimenera.

Antzingo Lokiz landa-eskolako ikasleek urteari hasiera eman diote zientzia proiektu berri batekin: Historiaurrea. Esteban Bilorian bizi da, eta oso gogoko du historia. Horregatik, ikastetxera joan da, proiektuari hasiera ematen laguntzeko, gaiari buruz dituen ezagutzak partekatuz garai hartako tresnen eta beste aztarna arkeologiko batzuen erakusketa txiki batean.

Ikasturte honetan, Tafallako Marqués de la Real Defensa HLHIPko Lehen Hezkuntzako 6. mailako ikasleek Afrikaren gaineko proiektu bat dute esku artean: bit.ly/africamilhistorias. Hainbat proposamen lantzen dituzte: 20 herrialde ezagutzea Espainian dituzten enbaxadei bidalitako gutunen bidez, kulturaren, arteen, aktibismoaren, kirolaren eta abarren arloko Afrikako edo afrikar jatorriko 40 pertsonarekin harremanetan jartzea… (horietatik guztietatik 18rekin dute harremana oraindik). Proiektu horretatik bi ekimen atera ziren: #KakaoEsklabotza eta #MOBILizaZaitezOihanarengatik.

Liceo Monjardín ikastetxeak, Herbehereetako, Suediako, Kroaziako eta Txekiar Errepublikako ikasleekin batera, abian du FutEUre food proiektua, etorkizuneko elikagaiei buruzkoa. Hiru ikasturteko iraupena izanen du, eta jardueren artean joan-etorriak daude: Europako zenbait ikasle Iruñera etorri berri dira; Iruñeko ikasleak Herbehereetan izan dira aurten, eta datorren urtean Suediara eta Kroaziara joanen dira.

Nafarroako Eskola Kontseiluak IDEA aldizkariaren 54. zenbakia argitaratu du. Kasu honetan, Nafarroako Hezkuntzaren aldeko Itun Soziala jorratzen du.

Herritarrekiko Harremanetako Departamentuak eta Navarro Villoslada BHIk “Mis amigos de entonces” antzerki-lana programatzen dute. Emanaldiak otsailean, martxoan eta apirilean izanen dira; martxoaren 27koa, Baluarten.

Nafarroako Saskibaloi Federazioak lehiaketarik gabeko kirol-hastapeneko EDUCA programa jarri du abian Lehen Hezkuntzako 1. eta 2. mailako (6-8 urte) neska-mutilentzat. Jarduera horrek ez du saskibaloia helburutzat hartzen, baizik eta parte-hartzaileek oinarrizko trebetasun psikomotorrak eta kirolarekiko gustua hartzea lortzeko bitartekotzat. Ekimena 2018an hasi zen, eta pandemiaren ondoren itzuli da.

Kinesis Napoliko L’Orientale Unibertsitateak gidatutako proiektu bat da, eta Nafarroako Unibertsitateko Kultura eta Gizarte Institutuaren eta Errealitate Sozialaren Behatokiaren laguntza ere badu. Horri esker, Italiatik, Alemaniatik, Herbehereetatik edo Estoniatik datozen ikasleek praktikak egiten ahalko dituzte despopulazioak kaltetutako Nafarroako herrietan.