LuzIA fundazioak zenbait jarduera antolatu ditu Nafarroako Gobernuarekin batera, hala nola Liceo Monjardín ikastetxean eginiko «Adimen artifizialaren astea». Orain, Iruñeko El Molino eta Tuterako Torre Monreal hezkuntza bereziko ikastetxeen txanda heldu da, eta, ondoren, Zizurko BHIrena. Urrian ikastetxe gehiago bilduko dira ekimenera.
«Adimen artifizialaren astea» izenekoan DBHko 1. eta 3. mailetako ikasleendako hiru prestakuntza-saio egiten dira, besteak beste. Lehenbiziko saioa teknikoa da, eta adimen artifizialak nola funtzionatzen duen azaltzeko erabiltzen da. Bigarrena praktikoa da, ikasleek adimen artifizial ezberdinekin jolastu eta saiakuntzak egin ditzaten; eta hirugarrenean, aldiz, etika lantzen da: datuen erabilera onaren edo okerraren ondorioak aztertzeko, baita abangoardiako teknologia horren aukerak eta abantailak ikusteko ere. Jarduera horiez gain, adimen artifizialaren programazioari buruzko mintegi berariazko bat ere egiten da DBHko 4. mailako eta Batxilergoko 1. mailako ikasleekin. Bestetik, gurasoendako erakusketa bat eta hitzaldi bat ere antolatzen dira adimen artifizialaren orainari eta etorkizunari buruz, eta arlo horretan dauden lan-aukerei buruz. Hezkuntza bereziko ikastetxeetan, irakasleendako beste bi jarduera ere antolatzen dira: pentsamendu konputazionalari eta adimen artifizialaren funtsezko alderdiei buruzko bat, eta beste bat ikastetxe horietako ikasleek alor horretan duten zereginari buruz.
Hona hemen Diario de Navarran 2022/03/09an agerturiko albistea.
Sarrera hau ere eskuragarri dago hemen: Espainiera