Nafarroako Unibertsitate Publikoko 3. mailako Ingeniaritzako ikasleen talde bat hirugarren sailkatu da Makinen eta Mekanismoen Teoriako 1. Olinpiada Nazionalean (OTM2), joan den asteko amaiera aldean, Madrilen.
Carlos III Unibertsitateak antolatutako lehiaketa hau, unibertsitateko ikasleei irekita dago eta arlo horretan hartutako ezagutzen eta trebetasunen aplikazio sortzailea egiteko lehiaketa da. Hala, bere alorreko ezagutzak eta berrikuntzak hedatzea eta talentua erakartzea lortu nahi da, bai enpresetan bai ikerketa zentroetan garatzen diren lanei jarraipena emateko xedez. Olinpiadaren informazio gehiago hemen aurkitu daiteke.
AEIM Ingeniaritza Mekanikoaren Espainiako Elkarteak diruz lagundutako olinpiada honek dauzkan xedeen artean daude Makinen eta Mekanismoen Teoria dinamizatzea eta haren irakaskuntzari balioa ematea. Irakasgai horiek orokorrean unibertsitate sailetako Ingeniaritza Mekanikoko arloan ematen dira.
Nafarroako Unibertsitate Publikoko taldea osatu dute Aitor Goñi, Ingeniaritza Mekanikoko ikaslea, Diego Cantabrana Luna eta Juan Deyo Maeztu Redín, Industria Teknologietako Ingeniaritza graduko ikasleak biak. Jokin Aginaga García Mekanika, Energetika eta Materialen Ingeniaritzako Saileko irakasleak zuzendu ditu ikasleak.
Sei unibertsitatetako hamazazpi ikaslek parte hartu zuten guztira, eta gai hauekin lotutako ariketak egin zituzten: zinematika eta mugimendu planoko mekanismoen dinamika, mekanismoen sintesia, espeken analisi zinematikoa, engranajeak eta engranajeen trenak, ardatzen orekatzea eta inertzia bolanteak.
Hurrengo edizioa Sevillako Unibertsitatean egingo da 2017an, lehiaketa bi urtetik behin egiten baita, eta bertan sailkatzen baitira taldeak Makinen eta Mekanismoen Teoriako Ikasleen Nazioarteko Olinpiadan (Students International Olympiad of Mechanism & Machine Science — SIOMMS) parte hartzeko. Makinen eta Mekanismoen Zientzien Nazioarteko Federazioak (IFToMM, ingeleseko siglak) diruz laguntzen du eta, halaber, Madrilgo Carlos III Unibertsitatean egingo da 2016. urtean.
Egin klik hemen berri osoa irakurtzeko.
Diario de Noticias-en argitaratu zen 2015/10/21ean.
Sarrera hau ere eskuragarri dago hemen: Espainiera