Hezkuntzako kontseilariaren aginduz, Eskola Kontseiluan COVID-19a hezkuntzan koordinatzeko lan batzorde bat sortu da, hezkuntza, osasun, unibertsitate eta Nafarroako Eskola Kontseiluko ordezkariek osatutakoa.
Osasun Departamentuaren hiru arduradun daude, zehazki, Nafarroako Osasun Publikoaren eta Lan Osasunaren Institutuaren (NOPLOI) arduradun batzuk. Hezkuntza Departamentuaren aldetik, honako hauek parte hartzen dute batzordean: Hezkuntzako Ikuskapen Zerbitzuko zuzendaria, Hezkuntzako Azpiegituren Zerbitzuko zuzendaria eta Hezkuntzako Informazio Sistemen Zerbitzuko zuzendaria. Unibertsitateko, Berrikuntzako eta Eraldaketa Digitaleko Departamentuaren izenean, Unibertsitateko Zerbitzuko zuzendariak hartzen du parte. Nafarroako Eskola Kontseiluko batzorde iraunkorreko kideak ere badaude batzorde horretan, hezkuntza komunitatea ordezkatzeko.
Lehen bilera gaur egin da goizeko 10:00etan, Nafarroako Eskola Kontseiluko osoko bilkuren aretoan. Bilera horretan honako hauek zehaztu dira, besteak beste, eta batzordearen oinarri gisa: eskolara ahalik eta seguruen itzultzen dela bermatzeko helburua duten ekintzak ikuskatu eta koordinatzea, eta ikasturtearen garapena zaindu eta kontrolatzea, ikastetxeetan kasu positiboak ager daitezkeela aurreikusita. Halaber, batzordea arduratuko da pandemiak irakaslanean duen eraginari buruzko informazioa kudeatzeaz.
Batzordearen asmoa da, alde batetik, lan egitea hezkuntza presentziala bermatzeko eta, beste aldetik, hezkuntza komunitatea seguru sentiaraztea.
Sarrera hau egin daiteke: Espainiera